Gráfica de Hanes-Woolf

Gráfica de Hanes de a/v fronte a a para a cinética de Michaelis–Menten.

En bioquímica, unha gráfica de Hanes–Woolf, representación de Hanes–Woolf, gráfica de Hanes, ou gráfica de $a/v$ fronte a $a$ é unha representación gráfica da cinética encimática na cal a proporción da concentración de substrato inicial $a$ respecto da velocidade de reacción $v$ se representa fronte a $a$. Está baseada na transformación da ecuación de Michaelis–Menten que se mostra abaixo:

$\frac{a}{v}=\frac{a}{V}+\frac{K_{\mathrm{m}}}{V}$

onde $K_{\mathrm{m}}$ é a constante de Michaelis e $V$ é a velocidade limitante.

J. B. S. Haldane sinalou, reiterando o que el e K. G. Stern escribiran no seu libro, que esta transformación da ecuación fora debida a Barnet Woolf. Porén, tratábase simplemente dunha das tres transformacións presentadas por Woolf. Foi publicada en primeiro lugar por C. S. Hanes, aínda que el non a utilizou como gráfica. Hanes indicou que o uso da regresión liñal para detreminar os parámetros cinéticos deste tipo de transformación liñal xera o mellor axuste entre os valores observados e os calculados de $1/v$, en vez de de $v$.Modelo:R

Empezando coa ecuación de Michaelis–Menten:

$v=\frac{Va}{K_{\mathrm{m}}+a}$

podemos tomar os recíprocos de ambos os membros da ecuación para obtermos a ecuación usada para representar a gráfica de Lineweaver–Burk:

$\frac{1}{v}=\frac{1}{V}+\frac{K_{\mathrm{m}}}{V}\cdot \frac{1}{a}$

que pode ser multiplicada en ambos os membros por $a$ para dar

$\frac{a}{v}=\frac{1}{V}\cdot a+\frac{K_{\mathrm{m}}}{V}$

Así, en ausencia de datos do erro experimental unha gráfica de $a/v$ fronte a $a$ dá lugar a unha liña recta de pendente $1/V$, un punto de corte nas ordenadas en $K_{\mathrm{m}}/V$ e outro nas abscisas en $-K_{\mathrm{m}}$.

Igual que outras técnicas que linearizan a ecuación de Michaelis–Menten, a representación de Hanes–Woolf tense utilizado historicamente para a determinación rápida dos parámetros cinéticos $K_{\mathrm{m}}$, $V$ e $K_{\mathrm{m}}/V$, pero foi en gran medida superada polos métodos de regresión non-liñal que son significativamente máis exactos e actualmente xa non son inaccesibles computacionalmente. Con todo, segue sendo útil como medio de representar os datos graficamente.

Véxase tamén

Outros artigos

• Cinética de Michaelis–Menten
• Gráfica de Lineweaver–Burk
• Gráfica de Eadie–Hofstee
• Gráfica liñal directa